الموضوع ده بيحصل لناس كتير .. تيجي تفيب تلاقي نفسك مش حاسس باي طعم و طبعا اول حاجة بتيجي في دماغك ان في مشكلة في التانك او الكويل وبعدين تيجي تدي لواحد صحبك يجرب تلاقيه مبسوط جدا من الطعم و يقولك انت اللي عندك مشكلة ... هوا اكيد عنده حق 😝😝😝
طيب خلينا نعرف ايه السبب و بعدين نقول الحل
اللسان بيبقي فيه خلايا و براعم مسئولة عن حاسة التذوق و محدش يقولي يعني ايه براعم ( اسمها بالانجليزي tongue buds ) 😂😂😂
بعد فترة المواد اللي في الليكويد زي ال PG وهو المسئول عن الفليفور بتتراكم علي اللسان و يتعود علي طعمها و بالتالي بيفقد القدرة علي تمييز الطعم باشارة من المخ طبعا
و مش بس اللسان .. المناخير كمان عليها عامل كبير في الموضوع (زي ما بيقولوا حاشر مناخيره في كل حاجة) يعني باختصار لازم المناخير تكون شغالة كويس عشان تقدر تميز الفليفور و تجمع بين الشم و التذوق لان الاتنين مربوطين ببعض كما اثببت الدراسات العلمية ( جرب كدة تغمض عينك و تسد مناخيرك و تشرب اي مشروب من غير ما تكون عارف ايه هوا هتلاقي نفسك مش عارف تميز الطعم كويس ) زي برده لما يكون عندك برد بتلاقي نفسك مش حاسس بطعم الاكل او السجاير
طيب ايه الحل ؟؟؟ 🤔🤔🤔
دي مجموعة من الحلول تقدر تجربها لو حصلك الموضوع ده ولو في حاجة منهم منفعتش معاك جرب التانية او جربهم كلهم
1 - وقف فيب لمدة يوم او يومين علي الأقل
2 - غير نوع الليكويد للاين تاني مؤقتا ( ويفضل الفليفورز القوية زي النعناع و القهوة و الشيكولاتة )
3 - غسيل الفم جيدا بأي مطهر للفم من الصيدلية
4 - تنظيف اللسان بضهر فرشة السنان اللي بيكون فيها جزء مخصوص لتنظيف اللسان
5 - اكل او لحس لمؤاخدة حاجة من دول لانها بتدي طعم قوي بيساعد علي تحفيذ خلايا السان انها تشتغل تاني ( النعناع الاخضر - اللمون - حبوب البن او القهوة) و ممكن تشرب قهوة بن تقيل برده
و ماتقلقش لو الموضوع ده طول معاك شوية ( يعني ممكن يقعد يومين او تلاتة او اكتر كمان )
كلان الجودة - الكلان El-Clan
